An Bude masallaci mai kama da Kubbatu Sakhra a Afghanistan
Kamfanin dillancin labaran iqna ya habarta cewa, ya nakalto daga shafin sadarwa na yanar gizo na TOLO News cewa, a ranar Juma’a 5 ga watan Nuwamba jami’an kungiyar Taliban sun bude wani masallaci da ke da gine-gine irin na Kubbatu Sakhra a birnin Kabul.
Wannan masallacin da ke tsaunin Wazir Muhammad Akbar Khan Kabul an yi shi ne da siffar Kubbatu Sakhra wanda aka sanya wa sunan Mullah Muhammad Omar Mujahid.
Ministan harkokin cikin gida na gwamnatin Taliban Sirajuddin Haqqani ya yi Allah wadai da jawabin da aka yi a wajen bude wannan masallacin game da hare-haren da Isra'ila ke kaiwa Gaza da kuma hare-haren da gwamnatin sahyoniyawa ke kai wa al'ummar Palastinu, ya kuma bayyana hakan a matsayin abin da ba za a yafe ba.
Yayin da yake bayyana cewa ya kamata dukkan musulmin duniya su goyi bayan Falasdinu, ya ce: Muna matukar Allah wadai da zaluncin da ake yi wa musulmin Palastinu, kuma muna daukar shi a matsayin laifin da ba za a gafartawa musulmi ba.
Sirajuddin Haqqani ya kara da cewa daukacin al'ummar musulmi ciki har da al'ummar Afganistan suna daukar kansu a matsayin abokan hadin gwiwa a cikin bakin cikin Palastinu tare da tausaya musu.
Mukaddashin ministan harkokin cikin gida na kungiyar Taliban ya ce: A wannan rana za a bude masallacin mu da sunan marigayi Mullah Mohammad Omar Mujahid da kuma tunawa da shi.
Wani kamfanin kasar Turkiyya ne ya tsara shi kuma ya gina shi. Wakilin wannan kamfani wanda ya halarci bikin ya bayyana cewa ya gina wannan masallaci ne domin darajar masallacin Al-Aqsa ya wanzu.
An gina wannan masallaci a kan fili mai fadin murabba'in mita 270 kan kudi dala 120,000 kuma yana da damar yin ibada 350.
Ya ce manufarmu ita ce gina masallatai uku da suka hada da masallacin Harami, da masallacin Annabi, da masallacin Aqsa, wadanda suke da kima na musamman ga musulmi.
